ក្រុមដែលជាប់ក្នុងបញ្ជីសម្រាំងចំនួន 10 ក្នុងកម្មវិធីពន្លឿនអាជីវកម្មកសិកម្មឌីជីថលSAAMBAT រដូវកាលទី២ បានរៀបចំបង្កើតសំណើអាជីវកម្ម(Business Plan Proposal) ដោយមានជំនួយពីក្រុមហ៊ុន Impact Hub Phnom Penh (SP5) នឹងបានឆ្លងកាត់វគ្គបណ្តុះបណ្តាលពេញម៉ោងរយៈពេល 3 ថ្ងៃ ក្នុងវគ្គបណ្តុះបណ្តាលគ្លីនិកអាជីវកម្ម(Business Clinic) រួចមកហើយ។ ថ្ងៃនេះជាថ្ងៃដំបូងនៃវគ្គធ្វើបទបង្ហាញសាកល្បង ដើម្បីផ្តល់ឱកាសអោយក្រុមនីមួយៗអាចហាត់សមធ្វើបទបង្ហាញសាកល្បងអំពីសំណើអាជីវកម្ម

ដើម្បីបង្ហាញគំនិតរបស់ពួកគេទៅកាន់ក្រុមគណៈកម្មាការដាក់ពិន្ទុ សម្រាប់ការវាយតម្លៃ និងផ្តល់មតិយោបល់កែលំអមុននឹងឈានដល់ថ្ងៃ Pitch Day។ គួរបញ្ជាក់ផងដែរថាដើម្បីឈានមកដល់វេទិកាធ្វើបទបង្ហាញនេះ ក្រុមសហគ្រិននីមួយៗ បានចំណាយពេលវេលានិងកម្លាំងកាយចិត្តធ្វើការបង្កើតគំរូបច្ចេកវិទ្យា សំណើអាជីវកម្ម (Business Plan Proposal)និងដំណោះស្រាយស្របទៅនឹងគោលដៅរបស់កម្មវិធីមូលនីធិប្រកួតប្រជែងរបស់គម្រោង SAAMBAT តាមរយៈការលើកកម្ពស់ការចាប់យកបច្ចេកវិទ្យាឌីជីថលក្នុងធុរកិច្ច និងដំណោះស្រាយប្រកបដោយនវានុវត្តន៍ភាពដើម្បីបំពេញចន្លោះខ្វះខាតនៃខ្សែច្រវាក់តម្លៃកសិកម្ម។ វគ្គធ្វើបទបង្ហាញនេះតម្រូវអោយក្រុមនីមួយស្វែងរកបញ្ហាប្រឈមដែលកំពុងកើតមាន រួចត្រូវធ្វើការបង្ហាញសមត្ថភាពក្នុងការដោះស្រាយប្រកបដោយនវានុវត្តន៍ភាពតាមរយៈផែនការអាជីវកម្មរបស់គេ គួបផ្សំរួមទាំងការបង្ហាញនូវលទ្ធភាពក្នុងការពង្រីកអាជីវកម្ម ការកសាងទំនុកចិត្តលើមុខជំនួញ និងសក្តានុភាពនៃការដំណើការប្រតិបត្តិការធុរកិច្ចប្រកបដោយចីរភាព។